نتكلم ببساطه .. كنت اليوم  في محكمة شمال القاهره الابتدائيه بالعباسيه ،   كان عندي قضية ايجارات تبدأ بعد الساعه 12 ظهرا ، لكني كنت هناك بدري شويه ، و بعدين لاحظت تجمع كبير من الناس في المحكمه حوالي ثلاثمائه او ربعمائه رجل و سيده يبدوا من وجوههم و ملابسهم انهم عمال ، طبعا علي طول و من غير شعور لقيت نفسي ماشي ناحيتهم بالتوجيه و سألتهم عن سبب تواجدهم في المحكمه ، يا تري قالوا ايه و كانوا جايين ليه ؟؟  .. هقول لحضراتكم حالا الحكايه .

طبعا انا قلبي اتوجع اكتر ما هو موجوع لما سمعت و عرفت الحكايه المره بتاعتهم ، الحكايه اياها بتاعة عمال مصر الغلابه الفقراء اللي رموهم في الشارع بعد ما باعوا الشركات و ضحكوا عليهم بقرشين ، العمال دول هما عمال شركة ايديال اللي اتخصخصت فاكرين يا حضرات شركة ايديال بتاعة الثلاجات للاسف باعوها ببلاش لمجموعة رجال اعمال اسمها اوليمبيك اليكتريك ، العمال ما صدقوا عرفوا اني محامي و عضو في لجنة الحريات في نقابة المحامين و بمجرد ما عرفوا كده لقيت واحد فيهم راح منادي بأعلي صوته يا جماعه تعالوا هنا الاستاذ من نقابة المحامين ، نقابة المحامين هتقف معانا .

 المهم قعدوا يحكوا و قالوا انهم كانوا عمال في شركة ايديال و الجماعه الكبار اشتروا الشركه بثلاثمائه و خمسة عشر مليون ، كل الشركه بفروعها و مصانعها و مخازنها ، واحد من العمال قرب مني و قال و الله يا استاذ دي البضاعه بس اللي كانت في المخازن تزيد عن المبلغ ده بكتير ، قلت لهم طيب ايه مشكلتكم دلوقت انتوا مش اخذتوا مكافأة معاش مبكر ؟؟ قالوا يعني اخذنا ايه عشرة الاف او خمسة عشر الف و الله يا بيه دول كانوا غصب عننا و كانوا بيخوفونا عشان نمشي ، قلت طيب ايه المشكله بتاعتكم اللي في المحكمه ؟؟ قالوا المشكله ان كان في ارض ملك الشركه علي طريق مصر اسماعيليه  مساحتها 26 فدان و الشركه قبل لما تتباع باعت للعمال منهم 3.5 فدان و كمان لينا في صندوق الزماله و العربيات و الاتوبيسات و الشركة الجديده بعد لما طردتنا قالت ان احنا ملناش حاجه فروحنا عملنا محضر في قسم النزهه عشان نأخذ الارض بتاعتنا اللي دفعنا فلوسها من جيبوبنا لانهم كانوا بيخصموا مننا ثمنها و بعدين النيابه اصدرت امر بغل يد جميع الاطراف عن الارض ، احنا و الشركة الجديده ، و الارض دلوقت تحت يد الشرطه .

قلت لهم طيب و القضيه اليوم طبعا بخصوص الارض دي ؟ قالوا ايوه احنا رافعين قضيه ضد  الشركه لأسترداد حيازتنا لهذه الارض و هما عندهم محامين كبار قوي و احنا المحامين بتوعنا مش عارفين منهم حاجه و القضيه عماله تتأجل مش عارفين ليه !! .

المهم في النهايه لقيت نفسي وزعت قضيتي و روحت حضرت معاهم الجلسه و عرفت  ان القضيه فيها اهمال كبير حتي لدرجة اني سألت القاضي اللي بينظر القضيه هل محضر الحيازه اللي العمال عملوه موجود في ملف القضيه ام لا ؟؟  قال لا مفيش محضر موجود عندي في الاوراق فطلبت من القاضي ضرورة ضمه الي ملف القضيه  !! .

كفايه بقي كده عشان انا طولت عليكم كتير هختصر شويه .. المحكمه قررت تأجيل القضيه عشان ضم المحضر و لتقديم صوره من عقد شراء الشركه كمان .

و دي طبعا كانت مأساه من مآسي عمال مصر اللي عشتها النهارده  و اللي عيشين فيها كلنا الايام دي ، الشركات كل يوم بتتباع و بلاش ، كل شوية رجال اعمال يخشوا علي شركه و يشتروها و يا ريت بيدفعوا ثمنها الحقيقي ، و اصبح عندنا اغلبيه فقيره في الشارع مشرده و اقليه غنيه في القصور و النعيم ، حتي 3 فدادين ارض مش عاوزين يسبوها للعمال الفقراء !! ..

 هقول ايه في النهايه كله بسبب نظام الحكم و الحزب الواحد اللي احنا فيه لو في حريه و ديموقراطيه حقيقيه و وزير مسئول امام الشعب مكنش ابداً ممكن تحصل كارثه زي دي !! .

اسعد هيكل